கலந்தாய்வு உத்தரவை மாற்றியதை கண்டித்து அரசு மருத்துவர்கள் தர்ணா

திருவொற்றியூர், ஜூலை 21: மருத்துவக் கல்வி இயக்ககம் நடத்திய கலந்தாய்வில் பெறப்பட்ட உத்தரவினை மாற்றியதைக் கண்டித்து தமிழ்நாடு அரசு மருத்துவர்கள் சங்கம் தர்ணா போராட்டம் புதன்கிழமை நடைபெற்றது.

சென்னை ஸ்டான்லி அரசு மருத்துவக் கல்லூரியில் நடைபெற்ற தர்ணா போராட்டத்தில் அரசு மருத்துவர்கள் நூற்றுக்கும் மேற்பட்டவர்கள் கலந்து கொண்டனர். அப்போது தர்ணா போராட்டம் குறித்து தமிழ்நாடு அரசு மருத்துவர்கள் சங்க தலைமை நிலைய செயலாளர் டாக்டர் பி.பாலகிருஷ்ணன் செய்தியாளர்களிடம் கூறியதாவது:

அரசு மருத்துவமனை, மருத்துவக் கல்லூரிகளில் ஏற்படும் காலியிடங்களை நிரப்புவதற்காக ஒவ்வொரு ஆண்டும் கலந்தாய்வு நடைபெறுகிறது. இந்த ஆண்டும் கலந்தாய்வு நடைபெற்றது. ஸ்டான்லி மருத்துவமனையில் கல்லீரல் மற்றும் வயிற்றுப்பகுதி சிகிச்சை பிரிவில் துறைத் தலைவர் பதவி காலியாக இருந்தது. இப்பதவிக்கு வர தற்போது கீழ்ப்பாக்கம் மருத்துவக் கல்லூரியில் பேராசிரியராக இருக்கும் டாக்டர் மனோகரன் என்பவர் விருப்பம் தெரிவித்துள்ளார். பணி மூப்பு அடிப்படையில் கலந்தாய்வில் துறைத் தலைவர் பதவிக்கான பணி உத்தரவும் அவருக்கு வழங்கப்பட்டது. இதற்கான பொறுப்பினை அவர் ஏற்பதற்கு முன்பே இதே துறைத் தலைவர் பதவிக்கு டாக்டர் யஸ்வந்த் என்பவர் நியமிக்கப்பட்டுள்ளார்.

பணி மூப்பு அடிப்படையில் மனோகரனை விட யஸ்வந்த் சுமார் 2 ஆயிரம் பேருக்கு பின்னால் உள்ளார். மேலும் டாக்டர் யஸ்வந்த் கலந்தாய்வில் கலந்து கொள்ளவும் இல்லை. மேலும் டாக்டர் மனோகரனின் மாணவர்தான் டாக்டர் யஸ்வந்த். இப்படி நடைமுறைகளை மீறி சரிப்படுத்தி ஒருவரை துறைத் தலைவராக நியமனம் செய்துள்ளது கண்டிக்கத் தக்கது. இந்நிலை தொடர்ந்தால் கலந்தாய்வு என்பதே அர்த்தமற்றதாக்கிவிடும்.

இதில் மருத்துவத் துறை உயர்நிலை அளவில் அதிகாரம் தவறாகப் பயன்படுத்தப்பட்டுள்ளது என நாங்கள் சந்தேகிக்கிறோம். எனவே இதில் தமிழக முதல்வர் உடனடியாகத் தலையிட்டு கலந்தாய்வில் அளிக்கப்பட்ட உத்தரவை நிறைவேற்ற வேண்டும் என கேட்டுக் கொள்ளவே இந்த தர்ணா போராட்டத்தை நடத்துகிறோம் என்றார் டாக்டர் பாலகிருஷ்ணன்.

போராட்டத்தில் சங்கத்தின் சென்னை மாவட்ட நிர்வாகிகள் டாக்டர் எஸ்.காசி, டாக்டர் எஸ்.திருநாவுக்கரசு, டாக்டர் நெடுஞ்செழியன் உள்ளிட்டோர் கலந்து கொண்டனர்.